Kò mwen se yon ti bato

Pou Laureta… mwen founi je gade lorizon k ap pase byen chèlbè nan miwa nawè w m anvi manyen brid ki mawonnen toutotou emosyon nou simbi ap navige nan dènye bras kò w m anvi voye kò m jete palòtbò toutantye apre sa m ava bliye kote m soti ata menm kote m prale sa sèlman mwen va sonje se kò m ki tounen ti bato andezo pou l pèdi andidan kò w lanm lanmou kapote m ap mennen m bwote m pote ale si mwen fè nofraj nan listwa w pa bliye se pou premye fwa van pral abiye an kola kenz genyen yon forè sitèlman bèl ki abite w mwen pa fouti imajine ki kalite pwezi k ap devide ladan mwen wè yon makòn nyaj deplwaye menm koulè ak soufrans mwen nan glè lonbrit ou k ap vini pran fre m chak moso kò mwen simaye miyèt pa miyèt krabinen nèt ale nan kat kwen lanmè ki separe vant ou.