Konfinmantalman m sòti
Vin aplodi yon sivilzasyon
K ap rakle nan pikèt
Se manman yon
bann ti kochon
k manje santiman
Nan po bannann
bwè dlo manyòk
Peyi Lejip temwen
Bondye pot ko bondye
Lagwa pa t pou piyay
Konfinmantalman m vin pou kont
Nan kafouyay brigan k ap tòde
kou linosans
Kraze sèvèl zele
Niche baton an
Tann mèt li
Se remò k konn pri santans
peyi yo piye yè
pot chay san l pa konnen
Maleng fè komès gal
Kot lapriyè monte
Rapid pichon tonbe
Loray pa konn mizè
doulè pyès pye palmis
Adye anblèm adye deviz
Papa
oumenm ki met konsyans
Lagann pisans nan mòg
Moun klima chanje po
Plis pase moul fo kòb yo
Retire kò w
Pou san pa vole sou ou
San dout yo konnen
Dessalines pat krabè
okenn God yo trust
Ni time ki money
Ti koutay ki fèt
nan vann moun pa lo
Janmen!
Yo envante kamera
Pou filme lanmò
Fè foto priz tè
Sou lestomak nou
Nanginen plenn
vale soupi
degobye rezon
Gwòs lanmizèrikòd!
Se klè
Klate pa jou
Nan rèv kolonize
Kot chak pèp ap priye
Solèy li tèt anba
lekòl s on fabrik ras
san kolòn vètebral
Ti dife volan yo bay
Pou demokrasi a
Boule depi m maten
avni lòm rapyetè
sivilzasyon
bann ti kochon
Ki bwè dlo manyòk la
Ap rakle nan pikèt lontan
Peyi Lejip te mwen
Bondye pot ko bondye
Lagwa pa t pou piyay
Nan konfinman pa m nan
Silans pete pòt syèl
Floyd l ap chèche
Jeudinema
Konfinmantalman
Jen 2020
.
