Nan yon senp jedou 

Ou kabre tout limanite

Puisans rega w fè n konfine

Tankou ti bebe nan vant

Chalè bouch ou

se dife boulèt kanno

Ou met tout moun sou do

Mask nan figi nou se boukliye

Depi w blayi sou latè

Nou nan lagè

Gade jan bouch yo tou louvri

Y ap vale bave mò

Se nan vale bave mò

Yo jwenn juisans yo

Yo jwi lanmò san jwi lavi.

Yo jwi lanmò san swente moso lespwa.

Yo jwi lanmò san yo pa gentan karese rèv yo.

Pwisans ou fè limanite monte lesyèl pa do

Nou konte zetwal nan kaye lanati gran lajounen

Se gade n gade lannwit blayi sou rèv nou

Rèv nou pran nesans nan kochma lanmò

Zetwal nou file devan je n

Lavi n tounen satelit ki pote move nouvèl

Lavi n tounen yon periferik enfòmatik

K ap enprime kadav sou papye tenbre.