Mètrès douvanjou
sakrifis solèy
Pistach griye
Pistach griye
tou kale, tou kale
La a kwen Gran ri
ak ri Bòn Fwa
yon fanm ansent
ak yon panyen lespwa
anba bwa l\'
ap pwomennen lavi l\'
gwo jounen
nan yon vye panyen
pousyè ap machande
pousyè fin machande
Yon fanm
ki pa konn ni krik ni krak
li pa bezwen nan kont ak pèsonn
yon fanm
k\'ap vann lavi l\' gwo jounen
yon vye panyen
yon bout godèt, tout lavi l\' prale
solèy pa leve
pou seche dlo nan je l\'
La a kwen Gran ri
ak ri Bòn Fwa
lavi kase koub
l\'ap ralanti
nan fon yon vye panyen
ak yon ti bout godèt
yon fanm ansent ki gwòs malè
yon fanm se li ki rele
se li ki reponn tèt li
yon fanm, yon mètrès fanm
senk bouch pandye ap tann
anvan lannwit tonbe kabicha
pistach griye, pistach griye
tou kale, tou kale
La a kwen gran Ri ak ri Bòn Fwa
lamizè chita kè pòpòz
ap chare, kabre lavi
nan fon yon vye panyen
pousyè ap machande
pousyè fin machande
yon vye panyen lespwa
jounen an vire do li, li ale
san gade devan, san gade dèyè
pyès moun
pèsonn pa reponn
solèy seche tout vwa
vwa etenn kou ti lanp tèt gridap
tout men
tout bouch pandye ap gade
pistach griye, pistach griye
tou kale, tou kale
metrès douvanjou prale
ti kal pa ti kal, ti zing pa ti zing
ti kras pa ti kras, miyèt moso
pitach griye pistach griye
tou kale, tou kale
Se kilès k\'ap machande,\'\'mezanmi\'\'
anvan lannwit foure bouch, nan koze l\'
Kilès.
