Akademi Kreyòl Ayisyen onore twa manm enstitisyon an nan lansman mwa kreyòl

Adeline Magloire Chancy, Pauris Jean – Baptiste, Pierre Michel Chéry se non twa (3) akademisyen, twa pèsonalite kreyolis Akademi Kreyòl Ayisyen onore vandredi 6 oktòb 2023 a nan kad lansman ofisyèl mwa selebrasyon lang ak kilti kreyòl, nan otèl Le Plaza. Akademisyen yo resevwa onè sila a alafwa pou angajman yo devlope depi digdantan an favè lang kreyòl epi pou bon jan kontribisyon yo nan vansman yon enstitisyon yo fè pati l depi kreyasyon l an 2014, daprè esplikasyon akademisyen Clotaire Saint – Natus ki t ap prezide seremoni omaj la. Nan seremoni ochan sa a, Adeline Chancy, 92 zan, manm fondatè mwa kreyòl nan Monreyal, resevwa egalman tit Akademisyèn emerit.