Revolisyon men goch

Douglas Zamor se yon powèt revolisyonè. Angajman sosyal ak angajman politik fè kò nan diskou li. Menm jan ak Jak Woumen, Jak Estefèn Aleksi an Ayiti te konn pran pozisyon nan ekri yo, se konsa Douglas fè nou goute esans diskou li pou transfòmasyon sosyete a. Powèm "Revolisyon men goch" li a, se yon bon grenn semans sou lèv nou. Tout ayisyen, tout mond lan dwe konnen l.

Publié le 2022-09-29 | lenouvelliste.com

Revolisyon men goch

mwen soti byen lwen sou papiy letan

ak yon tikal nan vyeyès mwen

pou m sa wouze sechrès andidan rèv

nan Granbwa

ou ta di nan peyi lòtbò dlo

solèy tonbe tou vèt nan branch

Ayiti an zigdekontraryete

file nan vant yon imajinasyon

twa fannal nan men goch

ak sèt grenn lenvizib alawonyay

pou m byen di w

tout pèp ki kanni nan kwen

dwe pase ak tout boulin anba tiyo revolisyon

m ap gade lenjistis sou yon tèt mòn

ou ta di chak peyi g on rèv y ap tchake nan pasaj

mwen fè loupin w a di se djak sal

pou m al chache byennèt ou timanman

yon gwo van malouk anba pye m

twa tanbou jouke nan vòltij mwen

ak yon kolye nwa mare nan vwa m

tankou m ta di w

yon kolonn tibonnaj ap glise sot tonbe nan branch

mezanmi

sezon yo aladriv nan granmèl

peyi a anboulatcha

epòk yo tchak

kente n ap  kente

nan mitan yon istwa pokannen

rèv nou baskile

wa ta di se blad k ap dodomeya nan touf kadas

vivi dangriyen nou plante nan rigòl

kisa demen ap ye

si chak moun ap viv ak yon vant enfomèl

isiba

kijan pou lanmè pa file lang ban nou

si laboujwazi s on tchòk kalbas

k ap dechouke pistach tibenn

anndan trip nou

nou krache lamizè nan figi lorizon

konsa mizè krache sou konpòtman nou tou

sanmba yo patinen ak senk ti tyovi ap balanse nan vwa yo

mòn lamizè kase sot tonbe sou kouray nou

nou se moso dlo nan kabinè mèt agwe

danmbala wèdo

se nan miwa nou wè yon men k ap sangle lavi

se nan miwa nou wè lanmou ap tchimen kwabosal

tankou yon mizik petwo

n ap drive anndan grennvant  Leta

twa bouji ble nan men goch

kat fil detè anba lang

ou tande kout woch lenvizib nan soufrans lan

yon sèl onomatope monte nan kè vil la

ou tande

nou p ap pran bannann nan men makwali

grenn pisans nou degrennen po

detere n vin detere lajistis anba lang ou

ou wè lespwa

kòd nan kou

ap jikle

lespwa danse djawèton

lespwa ooo lespwa ooo

se van ou k ap mennen nou nan ginen

nou tanbile

anbraje nou anbraje pirèd

annavan timoun

pase m sèt kout zago

yon boutèy babako

nou se mondonng

nou se senmafò

grenn kaka loray k ap satriyèt pouvwa politik

limyè likid k ap  dannggoye sou govi lenmò

Ayida wèdo

rèv nou deja tou santi wen

nou kreve souri lavni Lasalin

latifonndis nou mare nan demanbre

sou po vant tan an  ki chavire

lekratè voye yon pouf betiz

lav lamizè tonbe nan boujon souri

mòn nan ap gwonde

lalwèt latè ale nan vant li ak dis eleman yo

ak rato n ap ranmase bonnaj

konsyans levid aganmafwezi kouraj nou

men trip nou ap  tiglout somèy 

atmosfè a plane sou vant

chak zetwal s on mo

chak mo s on sòlda k ap

koule nan robinè revolisyon

nou lage lavni nan fon lanmè

poutèt yon kòb n ap bay lepèp zikòs

lavi nou se lavni nou

revolsyon pa fèt ak men dwat

revolisyon men goch se kolye madyòk

nan kou lepèp

pèp se legochè

yo tanpe nanm yo ak klou gagit

ou ka wè yon ran solèy ap fè laviwonndede

pa pale

se tout sa n pa wè yo ki pran kò

ki pran kòn nan mitan kè yon peyi

metwopol la kage sou do

yon boutèy piman nan men ap tchoure inosans li

balendjo alye Jan Rasin

misyon nou blayi sou figi legzistans

nanpwen wout pa bwa ankò

lanmounite grenpe pye falèz

ak on grenn kanpelwen nan men goch ou

se pou w kwòche Leta ak tout vestij li yo

pote vyann nan bay chen

nan tout tikwen karayib la

Douglas Zamor, Balendjo : Revolisyon men goch., Regwoupman Ekriven Kreyol (REK), Potoprens, 2019, pp 5-11.

Douglas Zamor douglaszamor@yahoo.fr
Auteur


Réagir à cet article