Boukan dife literati s on liv ansyen jounalis Joël Lorquet pibliye nan lane 2010 sou chapo Imprimerie Média – Texte. Liv sila a se tras pasaj li nan jounal Boukan soti lane 1983 pou bout 1991. Ak liv sa a, atis evanjelik la mennen nou nan yon epòk, kon di chante a, si w fèt avanyè ou pa ka konnen.
Non. Detwonpe ou. « Boukan dife literati » pa yon travay teyorik sou literati oswa yon liv refleksyon sou kesyon an. Mwen te anvi di se plis toujou. Se twasan onz (311) paj ki konsève nan fason pa l memwa yon epòk.