Festival liv ak Teknoloji

Publié le 2021-04-12 | lenouvelliste.com

Festi Liv ak Teknoloji se yon inisyativ « Kreyòl Excellence », anba patwonaj Sekretèri deta fòmasyon pwofesyonèl (INFP). Premye edisyon festival sa ap dewoule 17 pou bout 18 avril 2021, nan lakou «Saint-Louis de Gonzague», nan Dèlma 31. Plizyè aktivite pwograme tankou : ekspozisyon liv, liv papye kou liv nimerik. Ekspozisyon atizanal ak gastwonomik. Plis pase 25 otè ap siyen liv yo. Ekriven Maguy Durcé se envite donè premye edisyon sa a. 

Nan lide pou mete kanpe sou pye yon bibliyotèk ak yon laboratwa enfòmatik nan Pawas Karidad, nan Kafoufèy, asosiyasyon « Kreyòl Excellence » ap òganize yon festival liv ki marande ak teknoloji nan lekòl «Saint Louis de Gonzague» pandan 2 jou. 

Plizyè otè ap an siyati nan festival sila : Gary Victor, Cherlie Rivage, akademisyen Pierre Michel Chéry, Wilkens Scott Fifi, Darly Renois, Jessica Nazaire, Ansky Hilaire, Joubert Joseph, Adlyne Bonhomme, Johane Joseph, Kevin Pierre, Emmanuel Mathurin, Leblanc Gabynho, Douglas Zamor epi Maguy Durcé  envite alonè a. 

Maguy Durcé, se ekriven, inivèsitè. Li resevwa pri pwezi René Philoctète nan lane 2005 pou «Décalage». Li resevwa gran pri mòd afrokaribeyen nan lanne 2013. Ansyen minis, li pibliye plizyè rekèy powèm ak atik nan jounal «Le Nouvelliste».

Liv, gastwonomi, mizik 

Pandan 2 jou sila a yo ap gen yon dividal prestasyon mizikal, atis Jean Jean Roosevelt, Vens le Penseur, Esperancia Germain ap jwe nan lakou espas k ap resevwa aktivite sila a. Ap gen plizyè demonstrasyon sou teknoloji : pilotaj dwòn, aplikasyon mobil ak jwèt nimerik.

Ap genyen kèk modil fòmasyon tou sou fotografi nimerik. Nan pati gastwonomi an, patisipan yo ap ka achte diri ak lalo, tonmtonm elatriye.                          

« Nou batize festival la : “Festival Liv ak Teknoloji” se pou n lanse yon apèl pou entegrasyon zouti teknolojik yo nan aprantisaj ann Ayiti, pou n lanse yon mesaj bay editè yo pou yo panse ak teknoloji nan fason y ap prezante zèv yo », se deklarasyon Jackson Badeau, prezidan festival la. 

Jackson Badeau tou pwofite fè nou konnen, si lang se yon zouti kominikasyon pou anpil moun, men pou lòt li se yon fòm kote kèk pèp domine lòt pèp ak lang yo. Se sa k fè li chwazi yon non nan  lang kreyòl ki se lang tout ayisyen pou bay festival la: “Festival Liv ak Teknoloji”. « Nou pa dwe pèdi revolisyon teknolojik la tou, e pou nou rantre nan revolisyon teknolojik la nou dwe fèl an kreyòl paske tout ayisyen pa pale anglè ak fransè. Lang nou se baton developman ak epanouyisman nou. »

Kreyòl Excellence

«Kreyòl Excellence» se yon ajans evènmansyèl ki kreye nan lanne 2016 nan objektif pou fè evènman yon lòt fason. Yo òganize plizyè aktivite deja tankou : « Rankont liv Kreyòl », « Ayiti dantan », « Rendez vous rad Lakay ». Epi chak ane yo òganize yon gala pou moun andikape yo anba tèm  «Nou tout gen menm dwa».

Marc Sony Ricot
Auteur


Réagir à cet article