Ak yon ti bo pachiman
lang mwen tache nan tout kò l
tankou yon timoun foubòk
ki manje manje ranje
m pase yon lannuit lespri balonnen
depi jou sa a
m lonnen nan pye tab lanmou w
***
vale m
vale m
sa fè lontan m pa wè 7 koulè
m lonje dwèt sou ou
vale m
vale m m a rete nan tèt ou
men m son fouchèt 5 dan
m pwente l sou ou
san sèl sansès
vale m
vale m m a rete nan tèt ou
se nan bone w bonè m fè nich
***
depi yon pyebwa pèdi fèy
lakomin gentan sispèk
m p ap sèmante
ni avwe m renmen w
se pa tout koze ki pale nan bouch
yon jou vè powèm nan va temwaye
***
nan peche zetwal
syèl la blayi sou tèt nou
gadon mèvèy
Frank
linivè gen twòp fenèt
pito n pran de kout foli
pase n pran kòd
se pa nanm nou ki koupab
***
nou pa gen fòs ankò
sèl fòs nou rete
se fòs pèdi
si n t ap plante grenn bwa
nan plas tèt moun
anba tè
Ayiti t ap Amazoni
***
lannuit kou lajounen
pa gen mòn ak lavil
bal jwe nan tèt nou
tankou ti plim poul
kavalye n se lonbraj mò n
***
kilès ki pa konn Jòj
san fè estera
powèt la
mache fè chema
ak lang li sou papye
simen atè
depi se pyeton
ki foule beton an
pile krache l
***
o Lewa papa
si w mòde lang ou
se mwen k site non w
ou travèse men mak pye w rete
menmsi pèsonn pa konnen
konbyen fwa zong ou kase
nan pèse wout fè chimen
nan mitan yon touf chendan
o Lewa papa
si w mòde lang ou
se mwen k site non w
ou travèse men mak pye w rete
tankou senksan mach eskalye
***
isit ak laba
tankou 2 grenn je k ap vwayaje ansanm
youn pa wè lòt
pa mande m pouki sa k ale pa tounen
mistè lòt bò dlo se lwa rebèl
li pa danse nan tèt okenn istwa
pwen
***
pou m koud letènite
m file lavi nan yon zegui san je
lanmò pèd pasyans
li pati kite m nan penitans lan
Isaac Volcy, Prix Félix Morisseau Leroy de la poésie 2020
.