Selebrasyon Jounen lang ak kilti kreyòl

PUBLIÉ 2015-10-29


“Annou travay pou tout sèvis nou vin jwenn nou nan lang nou.” Se sou tèm sa Akademi Kreyòl Ayisyen an selebre Jounen lang ak kilti kreyòl la jou ki te 28 oktòb 2015 la nan kyòs Occide Jeanty sou Channmas. Plizyè otorite ki te pran lapawòl nan kad seremoni an, tankou pastè Pauris Jean-Baptiste, prezidan konsèy Akademi Kreyòl la ; Mesye Erol Josué, Direktè Biwo Nasyonal Etnoloji ; ak mesye Ary Régis, Direktè Sosyete Animasyon ak Kominikasyon Sosyal ; te felisite anpil efò ki fèt nan vilgarize lang kreyòl la, ke se nan biwo Leta osnon prive. Pastè Pauris te mete aksan sou nesesite pou n kontinye travay pou bay kreyòl la jarèt, pou tout moun ka benefisye de tout sèvis yo bezwen nan lang kreyòl, ki se lang manman ak papa yo. Nan kad selebrasyon sa a, Ministè Lakilti ak Akademi Kreyòl Ayisyen an te onore plizyè pèsonalite ki travay anpil pou avansman lang kreyòl la tankou Adeline Magloire Chancy, Fritz Desormes, Pauris Jean-Baptiste, Odette Roy Fombrun ak Yves Déjean. SAKS tou te rann yon omaj postim ak Sony Esteus ki te mouri nan kòmansman lane 2015 lan. Ary Régis te pwofite fè yon ti rale sou lavi Sony, sou wòl li te jwe nan mete sou pye radyo kominotè yo ak bay lang kreyòl la jarèt. Li te pwofite raple pou tout moun ke se gras ak Sony Esteus si gen selebrasyon Jounen entènasyonal lang ak kilti kreyòl nan peyi Dayiti. SAKS te pwofite okazyon sa pou l remèt pri premye edisyon konkou literè pou mete sou pye koleksyon Sony Esteus la ak pri repòtaj odyo pou jounalis. Pri konkou literè a te gen kat moun ki genyen Jean Moïse Destin pou woman "Nou tout Koupab" ; Feguenson Hermogène pou nouvèl " Man Franswa" ; Francklin LouiJean pou nouvèl "Kabalistik" ; epi Iléus Papillon pou pwezi "Fas kare foli'. Pri repòtaj odyo a, li menm, te gen twa jounalis ki genyen : se Robenson Henri, Radyo Kiskeya ; Alex Moïse, Radyo Concordia Jakmèl ; ak Brina Emmanuel Tolem, Radyo Kiskeya. Aktivite sa te make ak prestasyon plizyè atis ak gwoup tankou BIC, Bélo, Ti Koka, Rapadou ak defile mannken ki te mete rad kreyòl ki soti nan koleksyon Maëlle David. Ansanm aktivite pou selebrasyon mwa lang kreyòl ane sa yo te kòmanse nan dat premye oktòb pou l ta bout jou ki 28 oktòb la te rive posib gras ak sipò Ministè Lakilti, Fakilte Lengwistik, Inivèsite Leta Dayiti, UNESCO, Ministè Edikasyon Nasyonal ak Fòmasyon Pwofesyonèl.

Edine Celestin



Réagir à cet article